ჰარი პოტერი და დაწყევლილი ბავშვი – მერვე ისტორია 19 წლის შემდეგ

SHARE
, / 14
ჰარი პოტერი და დაწყევლილი ბავშვი – მერვე ისტორია 19 წლის შემდეგ

რამდენიმე დღის წინ გამოქვეყნდა პირველი ოფიციალური პოსტერი ჯ.კ. როულინგის პიესის – „ჰარი პოტერი და დაწყევლილი ბავშვი“, რომლის პრემიერაც 2016 წლის ზაფხულში ლონდონის Palace Theater-ში უნდა შედგეს. პიესაზე საუბარი ჯერ კიდევ ზაფხულში დაიწყო, თუმცა აქამდე მაყურებლისთვის არავითარი დეტალი არ ყოფილა ცნობილი. რამდენიმე დღის წინ კი, Pottermore-ის ოფიციალურ საიტზე პირველი სინოფსისი გავრცელდა, რომელიც შინაარსის შესახებ ასეთ ცნობებს გვაწვდის:

„ყოველთვის რთული იყო ჰარი პოტერად ყოფნა, მაგრამ არც ის არის ადვილი, იყო მაგიის სამინისტროს თავდაუზოგავი თანამშრომელი, მეუღლე და სამი მოზარდის მამა. ამასთან, უშედეგოდ ცდილობდე წარსულის საშინელი მოგონებების გადალახვას. სანამ ჰარი წარსულის უკან მოტოვებას ცდილობს, მისი უმცროსი ვაჟი სწორედ ამ სახელგანთქმული ისტორიის შედეგად მიღებული ე.წ. „მემკვიდრეობით“ იტანჯება. მასაც, როგორც მანამდე ჰარის, ჩვეულებრივი ცხოვრება სურს. წარსული და აწმყო ავისმომასწავებლად ერწყმის ერთმანეთს! ბოროტება იქიდან იჩენს თავს, საიდანაც ყველაზე ნაკლებად ელი!

აქამდე დადიოდა ხმები, რომ „ჰარი პოტერი და დაწყევლილი ბავშვი“ ჰარის მშობლებზე–ლილი და ჯეიმს პოტერებზე და მათ ცხოვრებაზე იქნებოდა, თუმცა, როგორც ვხედავთ, ჭორი არ გამართლდა.

„ეს ისტორია არსებობს იმ შესანიშნავი ხალხის წყალობით, რომელთაც მოუვიდათ ბრწყინვალე იდეა, რომ წარმოგვედგინა ჰარი პოტერი სცენაზე. დარწმუნებული ვარ, როდესაც მაყურებელი პიესას იხილავს, მიხვდება, რატომ ავირჩიეთ თეატრი ამ ისტორიის მოსაყოლად.“ – აცხადებს ჯოან როულინგი. როგორც ცნობილია, პიესაში „ჰარი პოტერის“ ოცდაათზე მეტი პერსონაჟი გამოჩნდება, თუმცა ქასთი ჯერჯერობით უცნობია.


ჰარი პოტერის პოპულარობას თუ გავითვალისწინებთ, იმედი უნდა ვიქონიოთ, რომ კომპანია Warner Bros. პიესას მომავალში ფილმად აქცევს. მანამდე კი მაყურებელს ჰარი პოტერის ისტორიის გაგრძელების ხილვა ლონდონის თეატრალურ სცენაზე 2016 წლის ზაფხულიდან შეეძლება.

ავტორი: გიორგი სუხიტაშვილი

წყარო: movieweb.com